हिंगणघाट पोलीस विभागाच्या भव्य प्रशासकीय इमारतीचे भूमिपूजन व अत्याधुनिक शीतगृहाचे लोकार्पण

 

​पालकमंत्री पंकज भोयर यांच्या हस्ते हिंगणघाटमध्ये विकासकामांचा धडाका

​हिंगणघाट (वर्धा): सचिन हाडके 

वर्धा जिल्ह्याचे पालकमंत्री श्री. पंकजजी भोयर यांच्या प्रमुख उपस्थितीत हिंगणघाट येथे पोलीस प्रशासनाच्या नव्या पर्वाचा श्रीगणेशा करण्यात आला. हिंगणघाट पोलीस स्टेशन आणि उपविभागीय पोलीस अधिकारी कार्यालयाच्या नवीन प्रशासकीय इमारतीचा भूमिपूजन समारंभ अत्यंत उत्साही वातावरणात पार पडला. याच दौऱ्यात नांदगाव रोडवरील कृषी उत्पन्न बाजार समितीच्या ५२८० मेट्रिक टन क्षमतेच्या अत्याधुनिक शीतगृहाचे (कोल्ड स्टोरेज) लोकार्पणही पालकमंत्र्यांच्या हस्ते करण्यात आले.

​पोलीस प्रशासन होणार अधिक 'हायटेक'

​हिंगणघाट उपविभागातील पोलीस प्रशासन अधिक सक्षम, आधुनिक आणि नागरिकाभिमुख व्हावे, या उद्देशाने या नव्या इमारतीचे नियोजन करण्यात आले आहे. या प्रस्तावित इमारतीत खालील सुविधा उपलब्ध असतील:

• ​पोलीस अधिकाऱ्यांसाठी सुसज्ज आणि आधुनिक कार्यालये.
• ​नागरिकांसाठी विशेष तक्रार निवारण कक्ष.
• ​महिला व बालकांसाठी स्वतंत्र आणि सुरक्षित सुविधा.
• ​अभिलेख कक्ष आणि प्रशस्त बैठक कक्ष.

​भूमिपूजन प्रसंगी बोलताना पालकमंत्री म्हणाले की, "पोलीस दल हा कायदा व सुव्यवस्थेचा कणा आहे. गृह विभागाच्या माध्यमातून पोलीस दलाच्या बळकटीकरणासाठी शासन कटिबद्ध असून, या नव्या वास्तूमुळे कर्मचाऱ्यांची कार्यक्षमता वाढेल आणि नागरिकांना जलद सेवा मिळेल."

​शेतकऱ्यांसाठी ५२८० मेट्रिक टन क्षमतेचे कोल्ड स्टोरेज

​शेतकरी हिताचा मोठा निर्णय घेत हिंगणघाट येथील नांदगाव रोडवर उभारण्यात आलेल्या अत्याधुनिक शीतगृहाचे लोकार्पण पालकमंत्र्यांनी केले. दीप प्रज्वलन आणि फित कापून या प्रकल्पाचे उद्घाटन करण्यात आले. ५२८० मेट्रिक टन क्षमता असलेल्या या शीतगृहामुळे परिसरातील शेतकऱ्यांच्या शेतमालाला योग्य साठवणूक मिळेल आणि त्यांना आर्थिक फायदा होईल.

​मान्यवरांची उपस्थिती

​या दोन्ही महत्वपूर्ण कार्यक्रमांना हिंगणघाटचे आमदार समीर कुणावार, माजी मंत्री रणजित दादा कांबळे, नगराध्यक्ष नैना तुडस्कर, माजी आमदार राजू तिमंडे यांसह स्थानिक लोकप्रतिनिधी, प्रशासकीय अधिकारी, पोलीस विभागाचे वरिष्ठ अधिकारी, कर्मचारी व नागरिक मोठ्या संख्येने उपस्थित होते.