हिंगणघाट पोलिसांची मोठी कारवाई; होळीच्या पार्श्वभूमीवर ३ गुन्ह्यात १ लाखांचा मुद्देमाल जप्त

 

​हिंगणघाट (प्रतिनिधी): सचिन हाडके

होळी आणि धुलीवंदन सणाच्या पार्श्वभूमीवर शहरात अवैध धंद्यांविरुद्ध कंबर कसलेल्या हिंगणघाट पोलिसांनी मोठी कारवाई केली आहे. गुन्हे प्रकटीकरण पथकाने (DB) तीन वेगवेगळ्या ठिकाणी छापे टाकून दारूची अवैध वाहतूक आणि साठा करणाऱ्या तिघांना जेरबंद केले असून, एकूण १ लाख ३ हजार रुपयांचा मुद्देमाल जप्त केला आहे.

​नाकेबंदीत मोपेडसह १८ वर्षीय तरुण अटकेत

​पहिली मोठी कारवाई नागरी रोड परिसरात करण्यात आली. गुन्हे प्रकटीकरण पथकाला माहिती मिळाली की, एक तरुण मोपेडने दारूची वाहतूक करत आहे. पोलीस निरीक्षक अनिल राऊत यांच्या मार्गदर्शनात सरकारी दवाखान्याजवळ नाकेबंदी केली असता, सुजल विनोद कडू (१८, रा. तहसील वॉर्ड) याला थांबवण्यात आले. त्याच्या झडतीत १५० देशी दारूच्या बाटल्या (किंमत १५,००० रु.) आणि ७० हजार रुपये किमतीची मोपेड (क्र. MH 32 AW 2465) असा एकूण ८५,००० रुपयांचा माल जप्त करण्यात आला.

​घरझडतीत विदेशी दारूचा साठा उघड

​दुसऱ्या कारवाईत पोलिसांनी डांगरी वॉर्ड येथे सोनू उर्फ प्रवीण ज्ञानेश्वर भांगे (३३) याच्या घरावर छापा टाकला. या घरझडतीत रॉयल स्टॅग कंपनीच्या विदेशी दारूचे पाच मोठे बंपर (२ लिटरचे) आढळले, ज्याची किंमत १५,००० रुपये आहे.

​तिसऱ्या कारवाईत 'रॉकेट' देशी दारू जप्त

​तिसरी कारवाई संत चोखोबा वॉर्डात करण्यात आली. येथील रहिवासी ओम सुपारे याच्याकडून रॉकेट कंपनीच्या ३० देशी दारूच्या बाटल्या (किंमत ३,००० रु.) जप्त करण्यात आल्या. तिन्ही प्रकरणांतील आरोपींविरुद्ध दारूबंदी कायदा आणि मोटार वाहन कायद्यानुसार गुन्हे दाखल करण्यात आले आहेत.

​तपास पथक:

​ही कारवाई वर्धा जिल्हा पोलीस अधीक्षक सौरभकुमार अग्रवाल, अप्पर पोलीस अधीक्षक सदाशिव वाघमारे, उपविभागीय पोलीस अधिकारी सुशील कुमार नायक यांच्या मार्गदर्शनाखाली हिंगणघाटचे ठाणेदार अनिल राऊत, डी.बी. पथकाचे प्रमुख सपोनि पद्माकर मुंडे, हवालदार प्रशांत ठोंबरे, राजेश शेंडे, आशिष नेवारे, मंगेश वाघमारे आणि रोहित साठे यांनी केली आहे.

​टीप: होळीच्या काळात अवैध दारू विक्री किंवा शांतता भंग करणाऱ्यांवर कठोर कारवाई करण्याचा इशारा पोलिसांनी दिला आहे.