विशेष बातमीदार वर्धा (दहेगाव गोसावी): आशीष अंबादे
दहेगाव गोसावी पोलीस ठाण्याच्या हद्दीत अवैधरीत्या काळ्या वाळूची चोरी करून वाहतूक करणाऱ्या ट्रॅक्टर-ट्रॉलीवर पोलिसांनी धडक कारवाई केली. या कारवाईत पोलिसांनी एका आरोपीला ताब्यात घेतले असून ट्रॅक्टर, ट्रॉली आणि वाळूसह एकूण ६ लाख ६० हजार रुपयांचा मुद्देमाल जप्त केला आहे.
मिळालेल्या माहितीनुसार, १ ऑक्टोबर रोजी मध्यरात्री दहेगाव गोसावी पोलीस ठाण्याचे ठाणेदार यशवंत कदम यांच्या मार्गदर्शनाखाली पोलिसांचे पथक परिसरात अवैध धंद्यांवर लक्ष ठेवण्यासाठी गस्तीवर होते. दरम्यान, हमदापूर येथील देरडा चौकातून अवैध वाळूची वाहतूक होणार असल्याची गोपनीय माहिती पोलिसांना मिळाली. या माहितीच्या आधारे पोलिसांनी देरडा चौकात सापळा रचून नाकाबंदी केली.
नाकाबंदीदरम्यान लाल रंगाच्या ट्रॅक्टरमधून हिरव्या रंगाच्या ट्रॉलीत काळी वाळू भरून चोरटी वाहतूक केली जात असल्याचे पोलिसांच्या निदर्शनास आले. पोलिसांनी ट्रॅक्टर थांबवण्याचा प्रयत्न केला असता, ट्रॅक्टर चालक शाम भारगुजी नैताम (रा. देऊळगाव शिवनगर) हा पोलिसांना पाहून घटनास्थळावरून पसार झाला. मात्र, पोलिसांनी तत्परता दाखवत ट्रॅक्टर मालक समीर विलास वैद्य (वय २६, रा. देऊळगाव शिवनगर, ता. सेलू, जि. वर्धा) याला ताब्यात घेतले.
जप्त केलेला मुद्देमाल:
- ट्रॅक्टर: मॅसी फर्ग्युसन कंपनीचा लाल रंगाचा ट्रॅक्टर (किंमत ₹५,००,०००/-)
- ट्रॉली: राज कंपनीची हिरव्या रंगाची ट्रॉली (किंमत ₹१,५०,०००/-)
- वाळू: अंदाजे १ ब्रास काळी वाळू (किंमत ₹१०,०००/-)
- एकूण जप्त रक्कमेचा मुद्देमाल: ₹६,६०,०००/-
गुन्हा दाखल व पुढील तपास:
या प्रकरणी शासनाच्या तक्रारीवरून गुन्हा क्रमांक १८८/२०२६ नुसार भारतीय न्याय संहितेच्या कलम (५) सह मोटार वाहन कायद्यातील कलम ३(१) आणि १८१ अन्वये गुन्हा नोंदवण्यात आला असून पुढील तपास सुरू आहे.
ही यशस्वी कारवाई पोलीस अधीक्षक सौरभकुमार अग्रवाल, अपर पोलीस अधीक्षक सदाशिव वाघमारे आणि उपविभागीय पोलीस अधिकारी सुनील महाडिक यांच्या मार्गदर्शनाखाली ठाणेदार यशवंत कदम, सहायक फौजदार ब्रह्मानंद मुन, पोलीस हवालदार आनंद भस्मे, राधाकिसन घुगे तसेच पोलीस अंमलदार कांचन चाफले, अनिल चिलगर आणि संदेश सोयाम यांच्या पथकाने केली.


टिप्पणी पोस्ट करा
0 टिप्पण्या