‘शिवछत्रपतींचे विचार हे केवळ विचार नसून अंगात थडथडी आणणारी ऊर्जा’ : व्याख्याते प्रसाददादा जांभुळकर

 

• ​आर्वी येथील बाजारवाडा परिसरात श्री प्रसाददादा जांभुळकर यांचे ओघवते व्याख्यान संपन्न
• ​बालगोपाल गणेश मंडळाच्या वतीने भव्य उपक्रम

​आर्वी (प्रतिनिधी): अर्पित वाहणे 

"छत्रपती शिवाजी महाराज हे केवळ एक नाव नसून अंगात थडथडी आणणारा एक ज्वलंत विचार आहे. आजच्या काळात फक्त महाराजांची जयंती साजरी करून चालणार नाही, तर त्यांचे विचार आणि संस्कार आपल्या रक्तात भिनवणे ही काळाची गरज आहे," असे प्रतिपादन प्रसिद्ध व्याख्याते श्री प्रसाददादा जांभुळकर यांनी केले. आर्वी येथील बाजारवाडा परिसरात आयोजित प्रबोधनात्मक व्याख्यान कार्यक्रमात ते बोलत होते.

​बालगोपाल गणेश मंडळाच्या वतीने बाजारवाडा, आर्वी येथे छत्रपती शिवाजी महाराजांच्या विचारांचा जागर करण्यासाठी या विशेष व्याख्यानाचे आयोजन करण्यात आले होते.

​प्रतिमा पूजनाने कार्यक्रमाचा प्रारंभ

कार्यक्रमाची सुरुवात युगपुरुष छत्रपती शिवाजी महाराज यांच्या प्रतिमेचे भावपूर्ण पूजन व माल्यार्पण करून करण्यात आली. यानंतर मंचावर उपस्थित मान्यवरांचा स्वागत सोहळा पार पडला. कार्यक्रमाचे अध्यक्ष श्री मोहनरावजी मढवे यांचे स्वागत पियुष चौधरी यांनी केले. उपाध्यक्ष श्री बाळूभाऊ राऊत यांचे स्वागत कुमार रोहित वरुडकर यांनी, तर प्रमुख पाहुणे श्री गजाननजी नेरकर यांचे स्वागत हर्षल बरडे यांनी केले.

​कार्यक्रमाचे प्रास्ताविक श्री नरेंद्रजी चौधरी यांनी मांडले. प्रास्ताविकामध्ये त्यांनी मंडळाच्या सामाजिक व सांस्कृतिक उपक्रमांचा आढावा घेत व्याख्यानाच्या आयोजनामागील भूमिका स्पष्ट केली.

​प्रसाददादा जांभुळकर यांचे जंगी स्वागत

मुख्य व्याख्याते श्री प्रसाददादा जांभुळकर यांचे व्यासपीठावर आगमन होताच उपस्थितांनी टाळ्यांच्या गजरात त्यांचे स्वागत केले. बालगोपाल गणेश मंडळाच्या कार्यकर्त्यांच्या वतीने त्यांना शाल व श्रीफळ देऊन सन्मानित करण्यात आले.

​गनिमी कावा, आरमार अन् रयतेचे राज्य : विचारांचे प्रबोधन

आपल्या ओघवत्या शैलीतील व्याख्यानात बोलताना प्रसाददादा जांभुळकर म्हणाले की, "जेव्हा रयतेवर परकीयांचे भीषण अत्याचार सुरू होते, तेव्हा राष्ट्रमाता जिजाऊंच्या संस्कारांनी शिवबांच्या मनात स्वराज्याची तुतारी फुंकली. अवघ्या सोळाव्या वर्षी रायेश्वराच्या साक्षीने स्वराज्य स्थापनेची शपथ घेऊन त्यांनी मातीची मूठ हातात धरत रक्ताचे पाणी केले. जावळीची खोरी असो वा पावनखिंडीचा रणसंग्राम, महाराजांनी कधीही अन्यायासमोर मान झुकवली नाही."

​पुढे बोलताना त्यांनी सांगितले की, "छत्रपती शिवाजी महाराज हे कोणत्याही एका जातीचे किंवा धर्माचे नव्हते, तर ते अथांग रयतेचे राजे होते. 'शेतकऱ्याच्या भाजीच्या देठालाही धक्का लागता कामा नये', असा सक्त आदेश देणारे ते एकमेव राजे होते. स्त्रीदाक्षिण्य, आदिलशाही व मुघलांना घाम फोडणारा गनिमी कावा आणि अथांग समुद्रावर भगवा झेंडा फडकवणारे आरमार उभे करून त्यांनी हिंदवी स्वराज्याची भक्कम पायाभरणी केली."

​या कार्यक्रमाला आर्वी परिसरातील नागरिक, युवक व बाल गोपाळ मोठ्या संख्येने उपस्थित होते. संपूर्ण परिसर 'जय भवानी, जय शिवाजी'च्या जयघोषाने दुमदुमून गेला होता.

​वार्ताहर / वृत्त प्रतिनिधी: अर्पित वाहाणे (मो. ८९५६६४७००४)