— बाजारवाडा गावात ‘एक गाव एक गणपती’ उपक्रमात DJ ला फाटा; पारंपरिक संस्कृतीचा जागर
विशेष बातमी प्रतिनिधी / बाजारवाडा:
"टाळ वाजे, मृदंग वाजे, वाजे हरीचा वीणा... माऊलींच्या पालखी सोहळ्याला, विठू भक्तांविना अर्थ उरेना!" आणि "देह पिंजरा झाला तरी आत्मा विठ्ठल विठ्ठल करतो..." या अभंगवाणीच्या जयघोषात अन् भक्तीरसात न्हाऊन निघालेल्या वातावरणात बाजारवाडा येथे श्री गणरायाला अत्यंत भावूक अन् उत्साही वातावरणात निरोप देण्यात आला.
वार्ध वारकरी दिंडी भारसवाडीच्या मृदंगाच्या बोलांवर आणि टाळांच्या तालावर संपूर्ण गाव विठ्ठलमय अन् गणेशमय झाले होते.
डीजेला फाटा, वारकरी दिंडीने निरोप
आजकाल विसर्जन मिरवणुकीत DJ चा मोठा गोंगाट पाहायला मिळतो; मात्र याला छेद देत बाजारवाडा गावाने एक नवा आदर्श घालून दिला आहे. DJ चा दणदणाट टाळून पारंपरिक वारकरी दिंडी काढून, अभंग-भजनाच्या गजरात गणपती बाप्पाचे विसर्जन करण्यात आले. वारकरी संप्रदाय आणि दिंडी हा महाराष्ट्राच्या सांस्कृतिक आणि आध्यात्मिक जीवनाचा कणा आहे. हाच वारसा जपत गावातील सर्व नागरिक, तरुण, महिला आणि भाविक या दिंडीत उत्स्फूर्तपणे सहभागी झाले होते.
‘एक गाव एक गणपती’तून एकतेचा संदेश
बाजारवाडा गावात दरवर्षी 'एक गाव एक गणपती' ही संकल्पना राबवली जाते. गावात शांतता, बंधुभाव, आपुलकी आणि एकोपा टिकून राहावा, हा यामागील मुख्य उद्देश आहे. गणेशोत्सवाच्या दहा दिवसांत केवळ उत्सव साजरा न करता सामाजिक भान जपले जाते.
उत्सवातील प्रमुख वैशिष्ट्ये:
- प्रबोधनात्मक कार्यक्रम: दररोज प्रबोधनात्मक व्याख्याने, कीर्तन आणि भजनांचे आयोजन.
- युवा संघटन: गावातील तरुणांना सामाजिक उपक्रमांत सहभागी करून घेत त्यांच्यावर चांगल्या संस्कारांची पेरणी.
- महिला व युवतींसाठी उपक्रम: महिला आणि युवतींच्या कलागुणांना वाव देण्यासाठी विविध स्पर्धा व कार्यक्रमांचे आयोजन.
गावकऱ्यांचा शिस्तबद्ध सहभाग
दिंडी म्हणजे केवळ एकत्र येणे नव्हे, तर ती एक शिस्तबद्ध, समतावादी आणि भक्तीरसाने न्हाऊन निघालेली जीवनशैली आहे, हेच चित्र विसर्जन मिरवणुकीत पाहायला मिळाले. सर्वात शेवटी संपूर्ण गावकरी मंडळींनी एकत्र येत, बाप्पाच्या चरणी नतमस्तक होऊन, पुढील वर्षी लवकर येण्याचे साकडे घालत वारकरी दिंडीच्या गजरात बाप्पाला निरोप दिला.
वार्तांकन: अर्पित वाहाणे
संपर्क: ८९५६६४७००४
टिप्पणी पोस्ट करा
0 टिप्पण्या